Lumobo sa 236 ang bilang ng mga biktima ng paputok sa pagsalubong sa Bagong Taon, base sa tala ng Department of Health (DoH).
Sa monitoring ng DoH sa fireworks-related incidents (FWRI), 98 pang kaso ang naitala sa unang araw ng Bagong Taon.
Ang mga bagong kaso ay naitala sa National Capital Region (NCR), na umabot sa 35; 22 sa Region 1; 13 sa Region 6; 6 sa Region 7; 5 sa Region 4-A; 4 sa Region 3; at tig-3 sa ARMM at Region 5.
Tig-dalawang kaso ang naitala sa Regions 4-B at 12, habang tig-isang kaso sa Regions 2, 9, at 11.
Amihan, easterlies, nakaaapekto sa bansa – PAGASA
Ayon sa DoH, dahil sa 98 bagong kaso, umabot na sa 236 ang FWRI cases na naitala nila mula Disyembre 21, 2018 hanggang 5:59 ng umaga nitong Enero 2.
Sa kabila nito, ipinagmalaki ng DoH na mas mababa pa rin ito ng 52% kumpara sa mga kasong naitala sa kahalintulad na reporting period noong nakaraang taon at 71% na mas mababa sa 5-year average period.
Pinakamaraming nabiktima ang kwitis na umabot sa 55 kaso, sumunod ang lusis (20), piccolo (19), boga (18), at 5-star (14).
Kaugnay nito, tiniyak ng DoH na pawang napagkalooban ng kaukulang lunas ang mga biktima at nasa maayos nang kalagayan.
-Mary Ann Santiago
