TAMPOK na isyu ang matagumpay na kampanya ng bansa sa dalawang international event sa 4th ‘Usapang Sports” ng Tabloid Organization in Philippine Sports (TOPS) bukas sa National Press Club (NPC) sa Intramuros, Manila. Ibibida ni Philippine Sports Commission (PSC) Commissioner and Chef de Mission Charles Raymond Maxey ang naging kampanya ng Team Philippines sa katatapos na 10th Brunei-Indonesia-Malaysia-Philippines-Northern Territory-East Asian Growth Area Friendship Games sa Brunei.
Naiuwi ng Team Philippines, kinatawan ng mga atleta mula sa Davao at Palawan, ang kabuuang 13 ginto, 14 silver at 17 bronze sa tatlong araw na torneo. Inaasahang ibibigay din ni Maxey ang detalye para sa 2020 hosting ng Davao City sa ika-11 edisyon ng torneo.
Magbibigay naman ng update ang Philippine Swimming League (PSL), sa pangunguna ni Chairman Sen.Nikki Ciseteng, kasama sina swimming sensations Marc Bryan Dula at Micaela Jasmine Mojdeh sa pagsabk sa 2018 Hamilton Aquatics Winter Long Course Swimming Championships sa Hamilton Aquatics Center sa Dubai, United Arab Emirates.
Sina Dula at Mojdeh ang ipinapalagay na ‘Philippines next swimming sensation’ bunsod nang tagumpay sa iba’t ibang torneo sa abroad.
Magsisimula ang session ganap na 10:00 ng umaga.
