Isang tricycle driver ang arestado matapos na mahulihan ng aabot sa P1.5-milyon halaga ng shabu sa isang buy-bust operation sa Sta. Mesa, Maynila, nitong Lunes ng gabi.
Kakasuhan ng paglabag sa Sections 5 at 11 ng Comprehensive Dangerous Drugs Act (RA 9165) si Sigair Mamarinta, 20, tricycle driver, ng Center Golden Mosque, sa Quiapo, Manila.
Batay sa ulat ng Manila Police District (MPD)-Sta. Mesa Police Station 8, dakong 6:00 ng gabi nang magkasa sila ng buy-bust operation laban sa suspek sa Pureza Street, kanto ng Ramon Magsaysay Boulevard sa Sta. Mesa.
Nang magkaabutan ng umano’y kontrabando at buy-bust money ay kaagad nang dinakma ng mga awtoridad ang suspek at binitbit sa presinto.
Bulkang Kanlaon, alert level 3 pa rin!
Nakumpiska mula sa suspek ang 11 plastic sachet ng hinihinalang shabu, na tumitimbang ng 230 gramo at may estimated street value na P1.5 milyon.
-Mary Ann Santiago
