BUTUAN CITY – Nilamon ng apoy ang 150 bahay sa Purok 1-A, Barangay Taglatawan, Bayugan City, Agusan del Sur, iniulat kahapon.
Gayunman, walang iniulat na nasaktan sa sunog na tumupok sa mga bahay sa Purok 1-A ng Bgy. Taglatawan, Bayugan City.
Sa inisyal na ulat na nakuha ng Balita mula sa Northeastern Mindanao Police Regional Office 13 (PRO 13) regional headquarters dito, nagsimula ang apoy sa ganap na 10:52 ng umaga nitong Biyernes.
Nagsimula umano ang apoy sa bahay ng isang hindi pa nakikilalang Maranao, na nilisan ang kanyang bahay, kasama ang pamilya nito, upang dumalo sa Eid al-Fitr celebration sa Marawi City.
KILALANIN: Si Kingston Ralph Cheng, ang 23-anyos negosyanteng nasawi sa hit-and-run
Habang isinusulat ito, patuloy na inaalam ng Bureau of Fire Protection (BFP) sa Bayugan City ang sanhi ng sunog.
Umabot sa ikaapat na alarma ang apoy at naapula bandang 2:30 ng hapon noong araw ding iyon.
Inaalam na ng awtoridad ang kabuuang bilang ng mga biktima. (Mike U. Crismundo)
