Ni Jun Fabon
Nalambat ng mga tauhan ng Station Drug Enforcement Unit (SDEU) ng Quezon City Police District (QCPD) ang isang operatiba ng Philippine National Police (PNP)-Maritime Group at 15 iba pa sa magkakahiwalay na buy-bust operations sa Quezon City nitong Linggo.
Kinilala ni Supt. Rossel Cejas, hepe ng QCPD-Station 6 Batasan, ang naarestong pulis na si PO1 Christopher Guevarra y Bagasala, 36, nakatalaga sa PNP Maritime Police.
Naaresto si Guevarra at anim na iba pa sa Barangay Payatas, dakong 6:00 ng gabi.
Nakumpiskahan umano ang mga suspek ng 18 pakete ng hinihinalang shabu, drug paraphernalia, buy-bust money, gayundin ang .9mm pistol at PNP ID ni Guevarra.
‘Tama na ang bakasyon!’ Akbayan Partylist, ikinatuwa pagkakadampot kay Zaldy Co
Siyam pang drug suspect ang dinakip ng SDEU sa magkakahiwalay na operasyon sa Bgy. Talipapa, Fairview, Project 4; Bgy. Galas; Bgy. San Isidro sa Cubao, Anonas; at Bgy. Botocan.
Nasamsam umano sa mga suspek ang ilang pakete ng hinihinalang shabu, drug paraphernalia at buy-bust money.
Nakakulong ngayon sa detention cell ng QCPD at kakasuhan ng paglabag sa Comprehensive Dangerous Drugs Act of 2002 (RA9165) sa Quezon City Prosecutors’ Office ang mga suspek.
