GINIBA ni Dasmariñas City, Cavite “super kid” Daniel Quizon si top seed Vietnamese International Master Tran Minh Thang para makasama ang kababayang si Fide Master John Marvin Miciano ng Davao City sa leadership board matapos ang Round 2 ng Open 18-yrs and below class ng Asian Youth Chess Championships Nitong Lunes sa Lotus Pang Suan Kaew Hotel sa Chiang Mai, Thailand.

Kasama rin nila bilang lider sina Arya Omidi ng Iran at Timur Nurzhanov ng Kazakhstan.

Si Quizon, top player nina Dasmariñas City, Cavite Mayor Elpidio “Pidi” Barzaga at Congresswoman Jenny Barzaga, ay namayani muna kay Jacob Joseph Chan ng Australia sa first round.

Sa panig naman ni Miciano, dinaig niya sina CM Regan Crowley ng Australia sa Round 1 at Ahmad Nazari Emir Rusyaidi ng Iran sa Round 2.

Mikee Cojuangco-Jaworski, chair ng Coordination Commission ng Brisbane 2032

Sa third round, makakaharap ni Miciano si Omidi sa Board 1 habang kasagupa naman ni Quizon si Nurzhanov sa Board 2.

Umeksena din si Michael Concio Jr.ng Dasmariñas City, Cavite na tinalo sina Wu Po-Sheng ng Chinese-Taipei at CM Ruslan Sezdbekov ng Kyrgyzstan ayon sa pagkakasunod para samahan ang apat pang manlalaro sa liderato sa Open 16 years old and below category.

Tampok din si Mark Jay Bacojo ng Dasmariñas City, Cavite na nangunguna sa Open 12 and under matapos pabagsakin sina Kajornmanee Prin ng Thailand at Wu David Tai-Wei ng Chinese-Taipei.

Si Rapid event Lone Bronze medallist John Jerish Velarde ng Lapu-Lapu City, Cebu ay nakatikim ng pagkabigo kay Yao Jia-You ng Chinese-Taipei sa Round 1 pero nawagi naman kay Hewage Dinupa Adithya ng Sri-Lanka sa Round 2.

May tig 2.0 puntos din sa kani-kanilang dibisyon sina Al-Basher “Basty” Buto ng Cainta, Rizal (Open 8 and under)at WCM Kylen Joy Mordido ng Dasmariñas City (Girls 18 and under).

Ang iba pang miyembro ng Philippine age group team ay sina Jerome Angelo Aragones ng Las Pinas City (1 pt/ Open 14 and under), Mhage Gerriahlou Sebastian ng Kalinga-Apayao (1 pt/ Girls 16 and under), Jerlyn Mae San Diego ng Dasmariñas, Cavite (1 pt/ Girls 14 and under), Antonella Berthe Racasa ng Marikina City (0.5 pt/ Girls 12 and under) at Daren dela Cruz ng Dasmariñas, Cavite, (1 pt/ Girls 10 and under).