Ni REGGGE BONOAN

DAHIL sa librong Beyond the Mark na ilalabas ni Mark Bautista ay naging katatawanan ang panayam kay Paolo Ballesteros ng entertainment press pagkatapos ng Q & A sa presscon ng pelikulang Amnesia Love.

May nagtanong kasi kung may plano rin siyang maglabas ng libro.

“Meron, pero tungkol lahat sa make-up transformation parang coffee table,” kaswal na sagot ng leading man ni Yam Concepcion sa pelikulang idinirehe ni Albert Langitan, produced ng Viva Films at ipapalabas sa Pebrero 28.

Nilinaw na tell-all book o tungkol sa sexual preference ni Paolo ang tinutukoy ng nagtanong.

“Ay, hindi! Saka kung ano ‘yung nakikita sa akin, wala naman na akong ilalabas pa,” mabilis niyang sagot.

Inamin ng aktor na gusto rin niyang proteksiyunan ang anak niyang babae na nandito na ngayon sa Pilipinas kasama ang ina at sa Baguio sila ngayon nakatira.

Tinanong namin si Paolo kung may nakarelasyon na siyang lalaki sa showbiz.

“Define relasyon. Intimate? Wala,” sagot ng aktor.

Maski after ng inuman o one-night stand?

“Maski hindi nakainom, mas maganda ‘yun.”

Hindi ba nagsasawang gumanap na bakla si Paolo sa mga pelikula niya, dahil tila paulit-ulit na lang at posibleng pagsawaan siya. Bakit hindi niya subukang gumanap sa karakter na straight guy?

“Puwede rin naman. Kaso kung doon (gay role) naman ako magaling, doon ako effective. Magpapakalalaki nga ako kung hindi naman ako effective, di ba?” katwiran ng aktor.

Pero willing naman daw siyang mag-explore ng ibang karakter.

Ang ganda ng ngiti ni Paolo nang tanungin kung okay sa kanya na may romantic leading man.”

“Aba, eh, okay ‘yun, siyempre!” sey niya na ikinatawa ng lahat.

Sino ang pangarap niyang leading man?

“O, di si Piolo (Pascual),” kaswal niyang sagot, dahil noon pa naman niya sinasabi na gusto niyang makatrabaho ang hunk actor.

Sabay dagdag pa ni Pao, “At isama na rin natin si Mark (Bautista), kiyeme!”

Naloka ang entertainment editors at reporters na kausap ni Paolo.

Hirit ng ex-SPEEd president na si Isah Red, ‘Ano ‘yan, love triangle?’

“Puwede, oo, why not?” nakangiting sagot ng aktor at hindi raw niya itatangging sinabi niya.

Hirit ulit namin, ano ang gustong titulo ni Paolo sa project nila nina Piolo at Mark?

“Tatsulok!” mabilis niyang sagot, at sabi namin, nagamit na ito sa pelikula (nina Amanda Page, Elizabeth Oropesa at Albert Martinez) noong 1998.

“Ay nagawa na ba ‘yun? Eh, di tatso-lok,” natatawa at pabaklang bigkas ng aktor kaya hagalpakan na naman ang lahat.

Tanong pa namin sa aktor, handa ba siyang magkaroon ng intimate/love scenes sa dalawang makakasama niya sa pelikula?

“Ready ba sila?” one-liner ni Paolo, at sabi pa, “ready tayo d’yan.”

Gaano ka-intimate ba?

“Personal level, echos!” tumawang sagot ng aktor.

All the way ba?

“Eh, tanungin muna sila (Piolo at Mark), baka hindi sila payag.”

Magmi-make-up transformation din ba si Paolo sa project nilang tatlo?

“Basta sila rin,” tumatawang sagot niya.

Grabeng hagalpakan na ang umalingawngaw sa venue ng Amnesia Love presscon at ang tanging nasabi na lang namin, ‘Hala, lagot!’

Ang ibang entertainment editors na kausap ni Paolo ay nahirinan na sa katatawa. Ang galing-galing talagang komedyante ni Paolo, ginawa na lang katatawanan ang mga pasabog ni Mark.

(There’s no business like show business. –Editor.)

Bibili ba si Paolo ng libro ni Mark?

“Ide-deliver ba niya sa akin? Kasi siyempre para may autograph.”

Sa nauna nang panayam kay Paolo, binanggit niyang, “Bibili ako kung ilalagay ni Mark ang number niya pagpirma niya.”

Hindi raw sila close ni Mark pero may ‘hi and hello’ sila kapag nagkakasalubong sa GMA-7.

Tanong namin uli, type ba ni Paolo si Mark?

“Okay lang!” sabay labas ng dila kaya hagalpakan na naman ang lahat.

Bakit nga pala gustong makuha ni Paolo ang number ni Mark?

“Para ano, ma-congratulate siya.”

Samantala, napakaguwapo ni Paolo kaya kahit bading siya ay marami pa rin ang nagkaka-crush at ang reaksiyon daw niya, “Ha?” sabay pabaklang lingon kaya tawanan na naman ang lahat.

Paano kung si Yam ang nagkagusto sa kanya?

“Bahket?” reaksiyon ng aktor sabay lingon sa dalaga.

Anyway, bukod kina Paolo at Yam ay kasama rin sa Amnesia Love sina Lander Vera Perez, Maricel Morales, Polo Ravales, Vandolph Quizon, Geleen Eugenio at Sinon Loresca.