Ni REGGEE BONOAN
HINDI napigilan ni Jacintha Magsaysay (Angel Locsin) ang pag-alis ni Malia (Kathryn Bernardo) para iligtas ang lalaking mahal nito, si Tristan (Daniel Padilla) sa umereng eksena ng La Luna Sangre nitong Lunes.
Kahit na anong paliwanag ni Jacintha sa delikadong susuungin nito dahil hindi pa ito handang lumaban kay Sandrino (Richard Gutierrez) dahil hindi pa lubos ang kapangyarihan nito ay bingi ang dalaga.
Employer umapela ng tulong para sa helper: 'Saklap ng health care system sa bansa natin!'
Pero nalaman sa umereng eksena nitong Martes ng gabi na na-underestimate ni Jacintha si Malia dahil lumabas na ang pagiging lobo nito at hinarap si Sandrino (Richard) at nagawang iligtas si Tristan at lumabas din ang sumpang tinta tulad ng sa hari ng mga bampira.
Natigalgal si Sandrino/Supremo sa nakita kay Tristan kung bakit pareho silang may tintang sumpa. Kaya nalito ito kung kaanu-ano nito ang lalaking iniligtas ng bagong Itinakda.
Nagkakatanungan din ang televiewers ng La Luna Sangre kung ano ni Sandrino (Richard) si Tristan (Daniel), anak o kapatid?
Ito ang matagal nang inaabangan ng KathNiel followers, ang paglabas ng powers nina Malia at Tristan. Pero palaisipan din kung magiging magkalaban nga ba ang dalawa.
Tinanong namin ang taga-production ng La Luna Sangre kung mananatili pa rin si Lia o Jacintha sa programa kapag lubusan nang lumabas ang kapangyarihan ni Malia, oo ang sagot sa amin, dahil kailangan pa ring tulungan ang huli kung paano tuluyang magagapi si Sandrino/Supremo.
‘Buti na lang at hindi sapaw ang taping ng La Luna Sangre at ng Pilipinas Got Talent Season 6 kaya puwedeng maglagare si Angel.
