Ni REGGEE BONOAN
MAY bahid yata ng katotohanan ang biro ni Mother Lily Monteverde na trillionaire na siya. Ang dami-dami pala ng naka-line-up na pelikulang ipapalabas niya. Bukod sa ipapasok na My Fairy Tail Love Story sa 2017 Metro Manila Film Festival ni Janella Salvador, kasado na ang playdate ng The Debutantes sa Oktubre 4.
Kasalukuyan namang kinukunan ang Mama’s Girl na pinagbibidahan ni Sofia Andres bilang anak at si Sylvia Sanchez naman ang ina mula sa direksiyon ni Connie Macatuno.
Guro, nakatanggap ng manok, mga rekadong pantinola mula sa pupil
Wala pang pahayag kung kailan ang showing ng Mama’s Girl pero ang sitsit sa amin ay posibleng ngayong 2017 din, hindi lang alam kung Nobyembre o Disyembre bago ang MMFF.
Kasama sa pelikula bilang leading man ni Sofia ang ex-boyfriend niyang si Diego Loyzaga na katambal din sa Pusong Ligaw.
Yes, Bossing DMB, ex-lovers na ngayon sina Sofia at Diego pero in speaking terms sila. Nag-usap sila na career muna ang prayoridad nila lalo’t maraming pumapasok na trabaho.
Mukhang love nina Mother Lily at Ms. Roselle Monteverde si Sofia na nakakatatlong pelikula na, nauna ang Pwera Usog at ang Our Mighty Yaya bilang alaga ni Ai Ai de las Alas.
Aktibo pa rin ang fans nina Sofia at Diego na Sofiego kahit break na sila, tuloy ang suporta nila sa love team ng dalawa.
Samantala, sa umeereng istorya ng Pusong Ligaw, inakala ni Teri (Beauty Gonzalez) na si Leon (Albie Casino) ang anak niya dahil ipinadoktor ni Jaime (Raymond Bagatsing) ang DNA test ng binata para mapaniwalang siya ang nawawalang anak ng asawa niya na gusto nitong mapasaya.
Hindi naman matanggap ni Marga (Bianca King) na natagpuan na ni Teri ang nawawalang anak dahil kapag nalaman ni Caloy (Joem Bascon) ay baka iwan siya at hindi na matuloy ang kanilang kasal.
Pero mukhang nagkamali si Jaime dahil may dalang problema sa buhay nila si Leon. Malalaman din ito kaagad ng asawa niya na hindi ang una ang anak nila kundi si Potpot (Diego Loyzaga) base sa kuwento ng matanda kina Melchor Policarpio (Smokey Manaloto) at sa asawang si Didit Policarpio (Almira Muhlach).
Nakipagkita na si Smokey kay Raymond para ipagtapat ang lahat.
Marami pang lihim na mabubunyag sa bawat karakter ng Pusong Ligaw na napapanood sa ABS-CBN pagkatapos ng It’s Showtime.
