Ni: Jun Fabon
Diretso sa selda ang isang Koreano, pitong sangkot sa ilegal na droga, tatlong wanted at isang Akyat-Bahay member sa Quezon City, iniulat kahapon.
Sa ulat ni Quezon City Police District (QCPD) Director Chief Supt. Guillermo Lorenzo T. Eleazar, inaresto ng Batasan Police- Station 6 si Hyunsup Cahe, 41, Koreano ng Vista Real, Barangay Batasan, bandang 2:30 ng hapon.
Naiulat na binubugbog ni Cahe ang kanyang misis na si Rowena na nagkaroon ng contusion at hematoma, base sa medical certificate.
Sec. Dizon, tiniyak maiibsan lagpas-taong baha sa Araneta, QC bago ang tag-ulan
Samantala, inaresto naman ng mga operatiba ng Loma Police Station (PS-1), sa pamumuno ni Police Supt. Robert Sales, ang umano’y nagnakaw ng cell phone na si Joven Marasigan, 32, ng Gana Compound, Bgy. Unang Sigaw, dakong 6:30 ng gabi.
Sa pamamagitan ng arrest warrant sa paglabag sa RA 6539 (Anti-Carnapping Law), dinakma ng Masambong Police-Station 2 si Jomari Ballester, 24, sa Palawan St., Bgy. Sto Cristo, Bago Bantay, dakong 9:00 ng gabi.
Inaresto rin ng Talipapa Police-Station 3 si Jovimar Dulman, 32, ng Sauyo Road, nang dukutan si Sarah Jane Dioce, pasahero ng jeep, bandang 4:00 ng hapon. Hindi rin nakaligtas sa awtoridad si Mary Anne Capili, 36, ng Bgy. Baesa, na nahulihan ng pitong pakete ng umano’y shabu at drug paraphernalia, bandang 11:00 ng umaga.
Nalambat naman ng Batasan Police Station- Station 6 ang mag-amang sina Mario Tadefa, 49, at Romina Tadefa, 23, pati na si Marlyn Laquinta, 39, na pawang bumabatak sa Road 4, Sitio Kumunoy, Bgy. Bagong Silangan, dakong 7:00 ng gabi.
Dinampot din, sa pamamagitan ng warrant of arrest, ang akusado sa homicide na si Edmhon Facundo, 45, sa QC Hall of Justice, bandang 11:30 ng umaga.
Kasunod nito, dakong 10:30 ng gabi, inaresto sa buy-bust operation si Mary Jane Trinio, 21, sa Hillcrest St., cor E. Rodriguez Sr. Avenue, Bgy. Immaculate Concepcion.
At pinosasan ng mga tauhan ng Anonas Police-Station 9 si Austine Cariaso, 43, sa Aguila St., Project 3, dakong 10:00 ng gabi.
