Ni: Erik Espina
SALUDO ako sa mga taga-Davao City na noon pa (ilang buwan na ang nakalilipas) ay walang pag-aalinlangang nagkabit ng mga poster sa mga pader na humahambalos sa CPP-NPA bilang mga “terorista”, “extortionista” at kontra sa kapayapaan.
Sa tingin ko, hindi magkakaroon ng lakas ng loob ang naturang lungsod kung hindi dahil sa alkalde nito, si Sarah Duterte. Maaaring may kinalaman ang pamahalaang lokal o kung hindi man ay “pinayagan” ang nabanggit na mga pambubulgar sa kabuuang siyudad laban sa komunistang grupo.
Matatandaang bunsod ito ng ilang pag-atake at panununog ng CPP-NPA sa ilang pribadong negosyo roon, at iba pa.
#KaFaithTalks: May lakas ka dahil kasama mo si Kristo
Kamakailan lamang, niratrat ang PSG ni Digong; tinambangan at napatay ang anim na PNP kasama ang mismong hepe ng Guihulngan, Negros Oriental. Sa Kitao, Bukidnon, isa ang patay at 11 sugatang AFP sa pag-atake ng NPA.
Naganap ang mga ito sa gitna ng itinataguyod na “Usapang Pangkapayapaan” ni Pangulong Rodrigo Duterte. At kahit pa pinagbigyan ang hanay nila makaupo sa gabinete ng Pangulo. Sa kulturang Pilipino, tulad ito sa pag-alok kumain o pinatuloy sa tahanan, at pinatulog pa sa kuwarto. Sa halip na suklian, lalong namihasa at binalasubas ang bukas-palad na pakikitungo ng pamahalaan.
Sa Quezon, “buslog kausap” ang turing sa ganitong katatas-pulong.
Daig nito ang “usapang-lasing”, dahil mas masahol pa ito roon. May sangkap ng “panghuhudas” ang lahat ng kanilang hangarin at pagkilos. Sa kanilang idolohiya, magkakaroon lang ng tunay na pagbabago sa pamamagitan ng “madugong rebolusyon” kaakibat ang madugong protesta. Sa madaling sabi, pagdanak ng dugo at basagan ng bungo. Isang kamulatan na dapat yakapin na ng mga taga-payo ng Malacañang sa “peace process”.
Hindi na magbabago ang gawi ng mga kaharap nila. Tama si DU30 “Let us stop talking. Let us resume the fight for another 50 years! Ayaw ko na makipag-usap sa kanila. Marami na silang utang”. Wakasan na ang telenovela ng pagtatraydor! Hindi pa rin ninyo gets? PSG na ang tinira.
Ilang buhay pa ng AFP at ng PNP ang dapat malagas at ilang pamilyang Pilipino pa ang magluluksa bago magising sa bangungot na magkaiba ang kapayapaang nais ng Pamahalaan at ng kampon nina Jose Ma. Sison?
