Ni: Francis T. Wakefield
Dinampot ng mga pulis at sundalo ang isang sub-leader ng Abu Sayyaf Group (ASG) at kanyang tauhan sa operasyon sa Tawi-Tawi nitong Huwebes.
Inaresto si Omar Harun, alyas “Halipa”, Abu Sayyaf sub-leader, ng mga operatiba ng Joint Task Force Tawi-Tawi, sa pangunguna ni Lt. Col. Luis Tamondong ng Marine Battalion Landing Team-8, at ng Tawi-Tawi Police Provincial Office sa Barangay Poblacion sa bayan ng Taganak, bandang 6:25 ng umaga.
Sa hiwalay na operasyon, nadakip naman ang isa pang bandido na si Ara Samindi sa Lagaan island sa Taganak, nang araw ding iyon.
Lolang bibisita sa City Jail, timbog matapos mahulihan ng ilegal na droga
Batay sa record, sina Samindi at Harun ay kapwa malapit sa mga sub-leader ng ASG na sina Alden Bagadi, alyas “Sayning”; Majan Sahijuan, alyas “Apo Mike”; at ang yumaong sina Abraham Hamid at Alhabsy Misaya.
Kapwa sangkot ang dalawa sa iba’t ibang insidente ng seajacking, kabilang ang pag-atake sa Vietnam-Flag vessel na MV Giang Hai sa Pearl Bank, Tawi-tawi, noong Pebrero 19, 2017, kung saan tinangay nila ang anim na tripulanteng Vietnamese at pinatay naman sa barko ang isa pa.
