MAINIT na tinanggap ng publiko si Liza Soberano bilang pinakabagong Darna sa ginanap na ToyCon 2017 nitong nakaraang weekend sa SMX Convention Center nang pormal na ilunsad ng ABS-CBN ang Ravelo Komiks Superheroes merchandise.
Napakalakas ng hiyawan ng lahat nang tawagin si Liza sa entabado para makasama ng ilang international stars sa ribbon-cutting ceremony. Pinasalamatan ng aktres ang Pinoy comic book fans sa patuloy na pagtangkilik sa industriya ng komiks.
“Masaya ako na makasama ang mga taong nagpapanatiling buhay sa industriya ng komiks lalo pa’t dito naman talaga nagsimula si Darna,” sabi ni Liza.
'Deserve mong i-flex anak!' Bakit nga ba naiyak ang isang guro sa regalo ng isang pupil?
Nang puntahan niya ang Ravelo Komiks Superheroes booth ng ABS-CBN, na eksklusibong nagbebenta ng Darna, Captain Barbell, at Lastikman merchandise at licensed statues at naka-exhibit din ang ilang memorabilia ni Mars Ravelo, ay dinumog ng fans si Liza. Isa sa mainit na sumalubong sa kanya ang mismong pamilya Ravelo na nakaharap niya sa unang pagkakataon.
“Napakabait nila at winelcome nila ako sa mundo ni Mars Ravelo. Masaya ako na nakilala ko sila and sana I can make them proud,” pahayag ni Liza.
Niregaluhan ng pamilya Ravelo si Liza ng unang apat na panels ng pinakaunang issue ng Darna komiks na may dedikasyon na, “Marami-rami na ring kamay ang dinaanan ng mahiwagang bato... At sa tagal ng paghahanap, ikaw ang mapalad na napili para magpatuloy ng galing at tapang ni Darna. Maraming salamat sa pagtanggap!”
Sumabak din si Liza sa meet-and-greet at game na game na nagpa-picture kasama ang fans.
Isa sa highlights ng ToyCon ang paggawad kay Mars Ravelo ng Pinoy Pop Culture Icon.
Nang tanungin kung ano ang tumatakbo sa kanyang isipan sa pagganap bilang Darna, inamin ni Liza na bagamat bago ang lahat sa kanya ay excited siya na simulan na ang proyekto.
“Excited ako na ninenerbyos kasi first time ko gumawa ng ganito. Madalas romance at comedy films ang ginagawa ko kaya ibang-iba talaga sa akin ang paggawa ng action film. Excited na akong simulan ito at excited din ako na mapanood ito ng lahat,” sagot ng dalaga.
Abangan ang paglipad ni Liza bilang pinakabagong Darna sa pelikulang ididirehe ni Erik Matti mula sa Star Cinema.
