Nalagutan ng hininga ang isang lalaki makaraang makuryente habang nagkakabit ng jumper o ilegal na koneksiyon ng kuryente sa Port Area, Maynila, kahapon ng madaling araw.
Nasaksihan pa umano ng mga kamag-anak ng biktimang si Randy Lavapie, 32, ang kanyang pagkamatay sa poste ng kuryente, malapit sa kanyang tahanan sa Barangay 650, Zone 68.
Sa imbestigasyon ng Manila Police District-Crimes Against Persons Investigation Section (MPD-CAPIS), agad nasawi si Lavapie nang hindi siya naibaba agad mula sa poste at kinailangan pa ng tulong ng mga tauhan ng power distributor.
Lumilitaw na dakong 2:00 ng madaling araw, umakyat si Lavapie sa poste ng kuryente upang magkabit ng jumper, ngunit siya ay napadikit sa live wire at tuluyang nangisay. (Mary Ann Santiago)
