WINALIS ng Pocari Sweat ang Philippines Air Force, 25-22, 25-14, 25-22, para sa unang panalo sa Premier Volleyball League (PVL) Reinforced Conference nitong Sabado sa Filoil Flying V Centre sa San Juan.
Impresibo mula simula hanggang sa pagtatapos ang Pocari para makalinya sa winning column matapos ang tatlong laro, habang bumagsak ang Jet Spikers sa 1-3.
“Deflating talaga yung nangyari sa amin,” ayon kay Pocari Sweat head coach Rommel Abella.“But I never lost confidence sa team namin.”
“Minor adjustments lang kinailangan namin kasi nag-improve kami from game one to game two. Hanggang 20 nakakalaban kami pero bumibitaw. Good thing, nag-perform yung leader namin this time,” aniya.
Nanguna sa panalo si Myla Pablo sa itinala nitong 23-puntos mula sa 18 hit, dalawang block at tatlong ace.
Pacman, balik-bakbakan sa Abril para sa exhibition match!
“Hopefully, ito na yung turnaround. Sabi ko nga sa kanila, kailangan muna natin ng isang panalo then we’ll go from there,” ani Abella . “Hopefully, ma-carry over namin ito.”
Pinangunahan naman ni Jocemer Tapic ang Air Force na dumanas ng dalawang sunod na pagkatalo sa itinala nitong 11 puntos. (Marivic Awitan)
