VICTORIA, Tarlac - Sa layuning manalo sa sabong, palihim umanong binali ng isang senior citizen ang kaliwang paa ng manok ng kanyang kalaban sa cockpit arena ng Barangay Batangbatang sa Victoria, Tarlac, kahapon ng madaling araw.
Ang pandaraya ay ini-report sa Victoria Police nina Alfredo Flores, 56, ng Bgy. Maliwalo, Tarlac City; Rommel Mañago, 49, ng Bgy. San Gavino; at Christopher Gambol, 36, ng Bgy. Bangar, Victoria, Tarlac.
Batay sa salaysay sa pulisya ng mga biktima, pasekreto umanong binali ni Rico Bejil, 64, ng Bgy. Saranay, Guimba, ang kaliwang paa ng sasabungin ng mga biktima.
Tapos na ang sabong nang mapansin ng mga biktima na bali ang kaliwang paa ng kanilang manok, na ini-report nila sa pulisya at inaresto si Bejil, na kalaunan ay umamin din. (Leandro Alborote)
