Sinibak sa puwesto ang dalawang pulis matapos maaktuhan ng kanilang hepe habang nag-iinuman sa loob ng Police Assistance Center (PAC) sa bayan ng Currimao sa Ilocos Norte, nitong Miyerkules ng gabi.
Hindi nagdalawang-isip si Senior Insp. Ryan Retotar, hepe ng Currimao Municipal Police, na sibakin sina PO2 Efren Macadaeg at PO3 Jonathan Juan makaraang mahuli niya ang mga ito na nag-iinuman sa loob ng PAC habang naka-duty.
Sinabi ni Retotar na hindi ito ang unang pagkakataon na naaktuhan niyang nag-iinuman ang dalawa niyang tauhan ngunit pinagsabihan at binalaan na umano niya ang mga ito.
Ayon kay Retotar, may nagsumbong sa kanya tungkol sa pag-iinuman nina Macadaeg at Juan sa PAC kaya dinisarmahan niya ang mga ito at ikinulong habang kapwa lasing.
6 dayuhang nagsasagawa ng medical mission sa Leyte, ninakawan!
Posibleng maharap sa kasong administratibo sina Macadaeg at Juan sa Ilocos Norte Police Provincial Office (INPPO).
(Fer Taboy)
