Matapos ang limang taon, sinampahan ng kasong paglabag sa Republic Act 3019 (Anti-Graft and Corrupt Practices Act) ang 12 opisyal ng Department of Agriculture (DA) sa Davao City dahil sa maanomalyang pagbili ng disinfectant na aabot sa P2.6 milyon.
Kabilang sa kinasuhan sina DA-Regional Field Unit XI (Davao City) Regional Executive Director Constancio Maghanoy, Jr.; Bids and Awards Committee (BAC) officials Isagani Basco (Chairman), Alma Mahinay (vice-chairperson), Alfredo Cayabyab, Rafael Mercado, Larry Pineda, Herna Palma, Rosalinda Mediano, Melani Provido, Isabelita Buduan, Lelisa Lascuña at Marie Ann Constantino.
Sinabi ng Ombudsman na ilegal ang pagbili ng ahensiya ng 38 drum ng disinfectant noong 2012, dahil hindi lowest bidder ang supplier na FKA Agri-Chemical Corporation (FKA).
