IPINAGDIRIWANG ngayon ng Manila Bulletin ang ika-117 anibersaryo. Nagsimula ito bilang apat na pahinang pahayagan na naglalathala ng mga impormasyon hinggil sa shipping at negosyo noong Pebrero 2, 1900. Nagsisimula noon ang bagong siglo at naghahanda ang Pilipinas para sa isang bago at modernong mundo makaraan ang tatlo at kalahating siglong pananakop ng mga Espanyol.
Ang paglalathala sa pahayagan sa Carriedo Street sa Maynila ay sinimulan ni Carson Taylor, isang guro mula sa Illinois, United States, na nagsilbi sa US Army noong Spanish-American War. Ang patnugot ay si H. G. Farris. Sila lamang dalawa ang nangasiwa sa paglalathala. Ganap itong naging pahayagan na may five-column tabloid format noong 1912, hanggang sa magkaroon na ng walong column noong 1918.
Iyon ay bagong panahon ng gobyerno at ng pambansang pamumuhay. Para sa mga pahayagan, iyon ang simula ng kalayaan sa pamamahayag na tinatamasa ng mga pahayagan sa Pilipinas magpahanggang ngayon. Ito ay kalayaang ipinagkaloob ng US Constitution na naging bahagi ng ating sariling Konstitusyon ng Pilipinas.
Inilalathala ang Manila Bulletin magmula noon, maliban sa apat na taong pananakop ng mga Hapon noong 1941-1945 nang isara ito ng sandatahang lakas ng Japan at ilang linggo nang ideklara naman ang martial law noong 1972.
Nahirapan ang lahat ng mga diyaryo na pinayagang makapaglathala noong nasa ilalim martial law ang bansa pero patuloy na nagsikap ang Manila Bulletin na makapaglabas ng mga balita na makabuluhan nang panahong iyon.
Unti-unti itong napansin ng publiko kaya nagkaroon ng masusugid na mga mambabasa ang Manila Bulletin at tumaas ang sirkulasyon na napapanatili nito hanggang ngayon bilang “The Nation’s Leading Newspaper.”
Pinangasiwaan ang Manila Bulletin noong mga unang taon ng martial law ng Swiss-Filipino na si Brig. Gen. Hanz Menzi.
Noong 1962, ipinasa niya ang pagmamay-ari ng publikasyon sa philanthropist-businessman na si Dr. Emilio T. Yap. Sa ilalim ng kanyang chairmanship, lumipat ang Manila Bulletin sa sarili jitong gusali sa Intramuros, nakabili ng sarili nitong five-story printing press, naglabas ng ilang bagong mga publikasyon, at naging public corporation. Nang pumanaw si Dr. Yap tatlong taon na ang nakalilipas, ang humalili sa kanya ay sina Chairman Basilio C. Yap at Vice Chairman and Executive Vice President Dr. Emilio C. Yap III at ang Manila Bulletin ay matatag na sumulong sa bagong panahon ng multi-platform communications. Ang ating print edition ay nananatiling solidong pundasyon kasabay ng ating On-Line at Social Media na tumatatag na rin sa digital world.
Kilala sa mundo ang pagiging malaya ng Pilipinong pamamahayag, sa aktibong pagkober sa malalaking pangyayari, at ang kahandaang ipaalala sa ating mga opisyal na karapatan at tungkulin nating maihatid sa publiko ang mga tamang impormasyon. Ang Manila Bulletin ay nangunguna sa dakilang tradisyong ito.
Ngayon ay kilala ang Manila Bulletin sa solidong coverage sa pambansa, pandaigdig, at lokal na mga pangyayari, na walang sensasyonalismo – tanging solido, tama, at responsableng pag-uulat sa mga balita, upang ang ating mga mambabasa ay ang maging “Fully Informed.” Ang mga pahina ng ating editoryal ay nagtatampok naman ng mga opinyon ng iba’t ibang respetadong personalidad na gagabay sa ating mga mambabasa sa pagsusuri sa mga nagaganap sa ating bansa at sa mundo, na bahagi ng kanilang tungkulin bilang mamamayan ng ating republika.
Sa ika-117 anibersaryo ng Manila Bulletin ngayon, muli nitong pinagtitibay ang katapatan sa kalayaan ng pamamahayag at mga mithiin, sa tama at responsableng paghahatid ng mga balita, sa pagbabahagi ng iba’t ibang mga opinyon, hanggang sa huli upang lahat tayo ay manatiling may kaalaman sa mga nangyayari, responsable, nagsisikap, at umuunlad na bansang Pilipino.
