Kasama na sa mga kinasuhan ng Department of Justice (DoJ) sa kidnap-slay sa Korean na si Jee Ick-joo si Supt. Rafael Dumlao, ang team leader ng binuwag na Anti-Illegal Drugs Group (AIDG) ng Philippine National Police (PNP).
Ito ay batay na rin sa ipinalabas na mga subpoena ni Senior Assistant State Prosecutor Juan Pedro Naverra, na mangangasiwa sa reinvestigation na iniutos ng Angeles City Regional Trial Court Branch 58.
Bukod kay Dumlao, respondent na rin sa kidnapping for ransom at serious illegal detention si Jerry Omlang, ang runner o volunteer sa National Bureau of Investigation (NBI) na umaming kinausap siya ni SPO3 Ricky Sta. Isabel para isakatuparan ang operasyon kay Jee.
Kasama rin sa reklamo ang dating pulis na si Gerardo Santiago, may-ari ng Gream Funeral Parlor na pinagdalhan kay Jee; at si Christopher Alan Gruenberg, ang may-ari ng kotse na kasama umano sa convoy nang dukutin si Jee sa Angeles City, Pampanga noong Oktubre 18, 2016.
Kauna-unahang abogadong Mangyan, pumanaw na!
Ipinatatawag din sa pagdinig ang iba pang respondents na sina Sta. Isabel, SPO4 Roy Villegas, SPO4 Ramon Yalung at PO2 Christopher Baldovino.
Pinasisipot din sa reinvestigation ang kasambahay ni Jee na si Marisa Dawis Morquicho, ang asawa ni Jee na si Choi Kyung Jin, at mga myembro ng PNP-Anti-Kidnapping Group na sina Senior Supt. Glenn Dumlao, SPO3 Reynaldo Curampez at Senior Insp. Jonathan Rabanal.
Itinakda ang pagdinig sa Biyernes, 2:00 ng hapon. (Beth Camia)
