SAN LEONARDO, Nueva Ecija - Pinaghahanap na ngayon ng San Leonardo Police ang isang 50-anyos na lalaki na nakabaril sa sarili niyang pitong taong gulang na apo matapos niyang ratratin ang bahay ng kanyang anak at manugang sa Purok 7 sa Barangay Mambangnan, nitong Linggo ng gabi.
Ayon sa San Leonardo Police, tumakas sakay sa kanyang Kawasaki Bajaj motorcycle ang suspek na si Angelito Paras y Fernando, 50, matapos ang pamamaril.
Sa imbestigasyon ni PO1 Jonnel Sabado, dakong 6:30 ng gabi nang sa hindi malamang dahilan ay pinagbabaril ni Paras ang bahay ng kanyang anak, at aksidenteng tinamaan ng dalawang ligaw na bala ang apo niyang si Andrei Cauzon y Paras, Grade 1 pupil, na noon ay naglalaro sa labas ng bahay.
Kritikal ang bata dahil sa tama ng mga bala sa kamay at dibdib. (Light A. Nolasco)
