LA PAZ, Tarlac - Natangayan ng malaking halaga at mga alahas ang isang mag-asawang negosyante matapos silang holdapin ng riding-in-tandem sa gate ng kanilang bahay sa Sitio Mait, Barangay San Roque, La Paz, Tarlac, nitong Miyerkules ng gabi.
Ayon kay PO1 Robin Vega, natangay sa mag-asawang Erlinda at Catalino Cansio, kapwa 63 anyos, ang mahigit P40,000 cash money, at isang gintong kuwintas na nagkakahalga ng P50,000.
Napag-alaman na nangyari ang panghoholdap dakong 6:30 ng gabi. Galing ang mag-asawa sa kanilang tindahan at papasok na sa gate ng kanilang bahay nang lapitan sila ng dalawang lalaking magkaangkas sa motorsiklo at nagdeklara ng holdap. (Leandro Alborote)
Probinsya
