ITATAMPOK ngayong Sabado (Setyembre 10) ang love story ng beteranong aktor na si Dick Israel sa Wagas.

Ayon kay Richardo Michaca na mas nakilala bilang si Dick Israel, love at first sight ang naramdaman niya nang makilala niya ang kanyang asawa na si Marilyn nang minsang magpahula ang tita nito sa kanyang ina.

At dahil mga bata pa sila, nagtanan at nagsama ang dalawa sa Baguio hanggang sa makabuo sila ng isang pamilya.

Pinalad namang maging artista sa pelikula si Dick nang matanggap siya sa isang audition at mula noon, naging maganda ang kanyang career. Naging paborito siyang kontrabida at sidekick ng mga action star.

Dahil sa kinang ng showbiz, napariwara si Dick. Iniwan niya si Marilyn at ang kanilang mga anak. Pero sa kabila nito, tiniis ni Marilyn ang lahat.

Naging masaklap ang kapalaran para kay Dick. Na-stroke siya at tuluy-tuloy na nanghina at nawalan ng trabaho.

Isang araw, pagbukas ng pintuan ni Marilyn, nasa labas Dick; bumabalik sa kanya. Walang usap-usapan o tanung-tanong, tinanggap niya ang asawa. Puno ng pagpapatawad at pagmamahal, binuksan ni Marilyn ang pintuan at binigyan ng pangalawang pagkakataon si Dick.

Nanatili si Marilyn sa tabi ni Dick. Siya ang nag-aalaga at sumusuporta sa asawa lalo na ngayong may sakit na ito at lumalaban sa buhay.

Panoorin ang wagas na kuwento ng pagpapatawad at walang sinusukat na pagmamahal tampok sina Ina Feleo, Mara Lopez, at Baron Geiser bilang Dick Israel.

Napapanood ang Wagas tuwing Sabado, 7 PM, sa GMA News TV.