ANG pagkukumpara sa bilang ng kaso ng Guillain-Barre syndrome bago at matapos maitala ang Zika virus sa pitong bansa ay nakatuklas sa malakas na ugnayan ng virus sa sakit, ayon sa mga mananaliksik ng Pan American Health Organization.
Unang natuklasan sa Brazil ang kasalukuyang Zika outbreak noong nakaraang taon at simula noon ay kumalat na sa bahagi ng Americas at ng Caribbean.
Ang mga buntis ang itinuturing na may pinakamataas na panganib sa virus dahil maaari itong magdulot ng malubhang birth defect sa sanggol, kabilang ang microcephaly o ang mas maliit na ulo at underdeveloped na utak. Sa Brazil, iniugnay ang Zika sa mahigit 1,800 kaso ng microcephaly.
Bagamat naitala ang mga unang alarma ng Zika sa Brazil ilang buwan bago natukoy ang mga kaso ng microcephaly, lumilitaw na ang matatanda na nagpapagaling mula sa impeksyon ng Zika ay may mas mataas kaysa normal rate na Guillan-Barre, isang autoimmune disorder na inaatake ang sariling katawan na dulot ng impeksyon, at tipikal na nangyayari ilang araw matapos ang pagkakasakit.
Sa ulat na inilabas bilang letter to the editor ng New England Journal of Medicine, sinuri ni Dr. Marcos Espinal, direktor ng department of communicable disease sa PAHO — ang regional arm ng World Health Organization — at ng kanyang mga kasama ang bilang ng mga kaso ng Guillain-Bare syndrome at Zika sa Bahia, Brazil, Colombia, Dominican Republic, El Salvador, Honduras, Suriname, at Venezuela.
Sinuri nila ang kabuuang 164,237 kumpirmado at hinihinalang kaso ng Zika virus at 1,474 na kaso ng Guillain-Barre na naitala sa pagitan ng Abril 1, 2015 hanggang Marso 31, 2016, gamit ang datos na nakalap gamit ang opisyal na ulat ng mga bansa.
Nadiskubre sa pag-aanalisa na malapit ang pagkakaugnay ng pagdami ng kaso ng Zika at pagtaas ng bilang ng may Guillain-Barre. Habang kumakaunti ang Zika infections sa bansa, bumababa rin ang sa Guillain-Barre, natuklasan ng grupo.
Kumpara sa pre-Zika rates, tumaas ang Guillain-Barre ng 172 porsiyento sa estado ng Bahia at Brazil na matinding tinamaan ng Zika outbreak. Natagpuan din nila ang pagkakapareho sa pagdami ng kaso sa ibang bansa, habang tumataas ang Guillain-Barre cases ng 211% sa Colombia, 150% sa Dominican Republic, 100% sa El Salvador, 144% sa Honduras, 400% sa Suriname, at 877% sa Venezuela.
Ayon sa resulta, inihayag ng mga researcher na ang Zika at Guillain –Barre “are strongly associated”. Gayunman, sinabi nila na marami pang pag-aaral ang dapat gawin para mapatunayan ang direktang pagkakaugnay ng dalawa.
Nagdudulot ang Guillain-Barre ng biglaang panghihina ng mga binti, braso, at itaas na bahagi ng katawan, habang sa ibang kaso naman ay temporary paralysis. Madalas kinakailangan ng mga pasyente ang matinding pag-aalaga at respirator para masuportahan ang paghinga. (Reuters)
