WALANG DAPAT PALIGTASIN

August 31, 2016

MATAGAL nang ipinasiya ng Korte Suprema na labag sa Konstitusyon ang Priority Development Assistance Funds (PDAF) at ang Disbursement Acceleration Program (DAP), subalit nais matiyak ng bagong liderato ng Department of Justice (DoJ) kung mayroon pang mga opisyal ng gobyerno na dapat managot sa bilyun-bilyong pisong pork barrel scam; kung may mga dati at kasalukuyang pinuno na hindi idinawit o talagang hindi isinama sa naturang iskandalo na kinasangkutan ni Janet Lim Napoles.

Magugunita na pagkatapos maisampa ng dating DoJ officials sa Office of the Ombudsman ang first batch ng sinasabing mga kasangkot sa naturang P10 billion pork barrel scam, hindi na ito nasundan ng second batch. Dahil dito, lumutang ang mga haka-haka na nagkaroon ng selective justice hinggil sa kung sinu-sino ang mga pulitiko na dapat sampahan ng demanda.

Maliwanag na ang mg isyung ito ang nais maliwanagan ni DoJ Secretary Vitaliano Aguirre bilang pagsunod sa tagubilin ni Presidente Duterte; nais ng administrasyon na muling sulyapan, wika nga, ang nabanggit na kasuklam-suklam na iskandalo na mistulang gumimbal sa nakalipas na pangasiwaan.

Nakababahala ang pahayag ni DoJ Secretary Aguirre: “Alam ko na sinupress ng DoJ yung evidence against the others.”

Kasabay nito, itinatanong niya kung bakit si Napoles ay kailangang sumuko kay dating Presidente Benigno “Noynoy” Aquino III sa Malacañang noong Agosto 28, 2013 at pagkatapos ay sinamahan pa ni DILG Secretary Manuel “Mar” Roxas II sa Camp Crame sa panahon na si Napoles ay may warrant of arrest kaugnay ng serious detention case.

Hindi na natin dapat pang busisiin ang naturang masalimuot na isyu na maituturing nang “water under the bridge”, wika nga. Ang dapat atupagin ngayon ng bagong pamunuan ng DoJ ay mangalap ng mga ebidensiya hindi lamang laban sa mga dating opisyal ng hinalinhang administrasyon kundi maging ng kasalukuyang mga pinuno na ang karamihan ay mga aktibo pang mga mambabatas. Sa katapatan at kakayahan sa pagtupad sa tungkulin ng kasalukuyang liderato, madali at epektibo nilang maisasampa ang kaukulang mga asunto hinggil sa walang habas na pandarambong ng salapi ng bayan. Malaki ang maitutulong ng Freedom of Information (FOI) bill na naisabatas sa pamamagitan ng isang Executive Order ni Presidente Duterte. Ito ang maglalantad sa mga katiwaliang kinasasangkutan ng kinauukulang mga pinuno, lalo na ng mga nasasakop ng Executive Department.

Dapat lamang tiyakin ng DoJ na wala itong dapat itanggi, tulad ng kanilang ibinibintang sa nakaraang administrasyon.

At sadyang walang dapat paligtasin alang-alang sa paglikha ng isang malinis na gobyerno. (Celo Lagmay)

#WalangPasok: Class suspensions ngayong Biyernes, Sept. 20

Narito ang listahan ng #WalangPasok sa ilang lugar sa bansa ngayong Biyernes, Setyembre 20 dahil sa masamang panahon dulot ng hanging Habagat.ALL LEVELSPozorrubio, Pangasinan (face-to-face, public and private)Calumpit, Bulacan (face-to-face, public and private)PAMPANGA - Minalin (face-to-face, public and private)- Candaba (face-to-face, public and private)NEGROS OCCIDENTAL-...

Tulfo brothers, nanguna sa senatorial survey ng OCTA

Nanguna ang magkapatid na sina ACT-CIS Party-list Rep. Erwin Tulfo at broadcaster Ben Tulfo sa 2025 senatorial survey ng OCTA Research.Sa Third Quarter Tugon ng Masa Survey ng OCTA, 60% ng mga Pilipino ang nagsabing si Erwin ang kanilang iboboto kung ngayon ginanap ang eleksyon, habang 57% ang kay Tulfo.Sumunod naman dito si dating Senate President Vicente “Tito” Sotto III na nakatanggap ng...

Rep. Paolo Duterte, iimbitahan ng House quad comm kaugnay ng drug war ng ama

Ipinahayag ng House Quad Committee nitong Huwebes, Setyembre 19, na iimbitahan nito si Davao City First District Rep. Paolo Duterte sa susunod nilang pagdinig kaugnay ng giyera kontra droga ng administrasyon ng kaniyang amang si dating pangulong Rodrigo Duterte.Inanunsyo ito ng quad comm matapos ipahayag ni Rep. Duterte ang kagustuhan niyang magtanong sa mga resource person ng pagdinig.“The...