Magtatayo ang Manila City government ng mga libreng charging station para sa mga electric tricycle (e-trike) na magsisimula nang mamamasada sa Setyembre.
Nakipag-ugnayan na si Manila Mayor Joseph “Erap” Estrada sa Manila Electric Company (Meralco) kaugnay sa itatayong charging stations na libreng magagamit ng e-trike drivers sa lungsod.
Sa ilalim ng e-trike project na ilulunsad sa Setyembre 15, mamahahagi ang pamahalaang lungsod ng 384 na e-trike na magiging pag-aari ng mga driver sa loob ng limang taon sa ilalim ng “boundary-hulog” scheme.
Nagkakahalaga ng P380,000 bawat isa, ang e-trike ay pinatatakbo ng baterya na tsina-charge ng apat hanggang limang oras. Kaya nitong magsakay ng hanggang pitong pasahero at tumatakbo sa bilis na 40-45 kilometro bawat oras.
