RIO DE JANEIRO – Tatangkain nina weightlifter Hidilyn Diaz at Nestor Colonia na maagang maapatan ang hapis ng Team Philippines mula sa kabiguan ng tatlong kababayan sa ikalawang araw ng aksiyon sa 2016 Rio Olympics dito.
Sasabak sina Diaz, pinakabeterano at makaranasan sa 13-man PH delegation sa kanyang ikatlong sunod na kampanya sa Olympics, at Colonia, lalaban sa kauna-unahang pagkakataon sa quadrennial Games sa ganap na 3:00 ng hapon ng Linggo (Lunes sa Manila).
Nakatakda namang sumabak si Rogen Ladon kontra Yurberjen Martinez ng Columbian sa Lunes (Martes sa Manila). Galing ang Columbian sa 3-0 panalo kontra Patrick Lourenco ng Brazil nitong Sabado (Linggo sa Manila).
Nakakuha ng bye si Ladon sa 49kg class at kailangan lamang niyang manalo ng dalawa para makasiguro ng bronze medal.
Naghihintay naman para sa kanilang pagkakataon sina judoka Kodo Nakano sa 81kg class sa Agosto 9; swimmer Jasmine Alkhaldi, sasabak sa women’s 100m freestyle sa Agosto 10; magsisimula ang golf event ni Miguel Tabuena sa Agosto 11; habang mapapalaban si marathoner Mary Joy Tabal sa Agosto 14; si hurdler Eric Cray sa Aug, 15; long jumper Marestella Torres sa Agosto 16; at taekwondo jin Kirstie Elaine Alora sa +67kg sa Agosto 20.
