Muhammad ‘The Greatest’ Ali, pumanaw sa edad na 74.
PHOENIX (AP) – Pinabagal man ng karamdaman ang kanyang galaw, nanatiling palaban hanggang sa kanyang huling laban ang tinaguriang “The Greatest”.
Matapos ang ilang taong pakikibaka sa Parkinson’s Disease, mapayapang pumanaw si Muhammad Ali nitong Biyernes (Sabado sa Manila) sa edad na 74. Kapiling ang kanyang pamilya at mga kaibigan nang tuluyang isuko nang itinuturing na pinakasikat na atleta sa mundo ang pinakamabigat niyang laban.
₱10 na kita kada pastil, paano nakatulong sa pag-aaral ng isang iskolar sa Maynila?
Isinugod siya sa ospital nitong Huwebes dahil sa kahirapan sa paghinga.
“It’s a sad day for life, man. I loved Muhammad Ali. He was my friend. Ali will never die,” pahayag ni Don King, ang pamosong boxing promoter na nagsulong sa pinakamalalaking laban sa career ni Ali, sa panayam ng Associated Press.
“Like Martin Luther King his spirit will live on, he stood for the world,” aniya.
Nakatakdang iburol ang mga labi ni Ali sa kanyang tahanan sa Louisville, Kentucky. Inihahanda ng pamahalaang lungsod ang pagbibigay-pugay sa kampeon sa Sabado (Linggo sa Manila).
Ipinag-utos ni Louisville Mayor Greg Fischer na ilagay ang watawat sa “half-staff” bilang pagkilala sa pinakatanyag na anak ng lungsod.
“The values of hard work, conviction and compassion that Muhammad Ali developed while growing up in Louisville helped him become a global icon,” pahayag ni Fischer. “As a boxer, he became The Greatest, though his most lasting victories happened outside the ring.”
Tangan ang bilis at lakas ng kamao, gayundin ang matalim na pananalita laban sa kanyang mga karibal, dinomina ni Ali ang mundo ng boxing sa mahabang panahon.
At sa kabila ng kanyang karamdaman na nakuha sa libu-libong suntok sa ulo sa kabuan ng kanyang career na umabot ng mahigit tatlong dekada, nanatili ang kasikatan at karisma ng one-time Olympic champion.
“He was the greatest fighter of all time but his boxing career is secondary to his contribution to the world,” sambit ni promoter Bob Arum. “He’s the most transforming figure of my time certainly.”
Sa taas na 6-foot-3 at bigat na 210 lbs., sumikat at minahal ng buong mundo si Ali. Tumatak sa isipan ng lahat ang katagang “Float like a butterfly, sting like a bee,” na naibulalas ng isang broadcaster dahil sa kahusayan na ipinamalas niya sa laban.
Sa kanyang pagreretiro noong 1981, tangan ni Ali ang kartang 56-5, tampok ang 37 knockout — kabilang ang 26 sa pangangasiwa ni Arum — at tanging fighter na nagwagi ng heavyweight titles sa tatlong pagkakataon.
Pinatulog niya ang noo’y kinatatakutan na si Sonny Liston – hindi lang isa kundi dalawang ulit – habang pinaluhod ang noo’y tila moog na si George Foreman sa pamosong “rope-a-dope” sa Zaire, gayundin ang walang kapantay na duwelo kay Joe Frazier sa “Thrilla in Manila”.
“Rumble, young man, rumble,” ang pamosong kataga ng kanyang cornerman na si Bundini Brown.
“I am the greatest,” ang paulit-ulit na pahayag ni Ali.
Sa kanyang aura at tagumpay, tila walang makikipagtalo sa usapin.
Maging ang isa sa kanyang mahigpit na karibal na si Foreman ay napabilib at napahanga ng katauhan ni Ali.
Pinarangalan niya si Ali sa pagdiriwang ng ika-35 taong anibersaryo ng kanilang laban na “Rumble in the Jungle,” kung saan pinasuko siya ni Ali sa ikawalong round para sa heavyweight title noong 1974.
“I don’t call him the best boxer of all time, but he’s the greatest human being I ever met,” pahayag ni Foreman.
“To this day he’s the most exciting person I ever met in my life.”
Ipinanganak bilang Cassius Marcellus Clay noong Enero 17, 1942 si Ali sa Louisville, Kentucky. Nagsimula siyang magboksing sa edad na 12 matapos nakawin ang kanyang bagong biling bisikleta.
Nagsimula siyang turuan ng kapit-bahay nilang pulis na si Joe Martin at naging matagumpay sa kanyang amateur career, tampok ang panalo sa heavyeight class ng 1960 Rome Olympics.
