Makikipagsapalaran sa araw na ito ang dalawang bata at walang talong Filipino fighters sa Russia para makatuos ang mga tigasing Russian boxers sa magkahiwalay na nakatayang World Boxing Organization (WBO) Intercontinental title fights sa DIVS, Ekaterinburg.
Dumayo ang pamosong fighter ng Sanman Gym na sina Super Featherweight Romero Duno at Featherweight Rimar Metuda kasama ang kanilang batambatang promoter na si Jim Claude Manangquil para ibida ang husay ng Pinoy.
Makakasagupa ni Duno (9-0, 8 knockouts) ang kapwa niya 20 anyos at wala ring talo na si Mikhail Alexeev (7-0, 3 knockouts) para sa WBO Intercontinental Super Featherweight title, habang magsasalpukan naman ang 22 anyos at kaliweteng si Metuda (10-0, 5 knockouts) at ang 19 anyos na si Mark Urvanov para sa WBO Intercontinental Youth Featherweight title.
Kagagaling lamang ni Duno sa 8th round technical knockout victory sa beteranong si Jason Egera para mahablot ang Philippine Boxing Federation title. Nauna naman niyang ikinasa ang 3rd round TKO kay Eusebio Baluarte sa nakaiskedyul na eight round bout.
PBA fans, tinawag na ‘anak sa labas’ si Abueva dahil daw sa unfair na hatol ng PBA
Samantala, ikinamada ni Metuda ang 2nd round knockout sa scheduled six round bout kontra kay Joel Hecotibo nito lamang Marso 8 makaraang maimarka ang ten round decision win sa isa pang beteranong si Jaime Barcelona noong Nobyembre 27 noong nakaraang taon.
Pinuwersa naman ni Alexeev na magretiro sa 3rd round ang kanyang kababayang si Evgeny Torabukin noong Marso 5, habang isinalansan ni Urvanov ang 10th round shutout kay Alexey Shorokhuv noong Pebrero 27, 2016. (Gilbert Espena)
