Agad na nag-uwi ng tig-isang gintong medalya sina Erlinda Lavandia at Arnel Fererra sa unang araw ng paglahok ng delegasyon ng Pilipinas sa ginaganap na 19th Asia Masters Athletics Championships 2016, sa National Stadium sa Singapore.
Inihagis ng tatlong sunod na kampeon na si Lavandia ang layong 31.34 metro sa kanyang huling hagis sa W60 Javelin Throw Masters upang matagumpay na masimulan ang kampanya ng bansa. Si Lavandia rin ng nagtatanggol na kampeon sa discus throw at shot put.
Pumangalawa kay Lavandia si Yu Eng Tay ng Malaysia na may 27.30m at pumangatlo si R., Bhuvaneshwari ng India na layong 20.25m.
'Deserve mong i-flex anak!' Bakit nga ba naiyak ang isang guro sa regalo ng isang pupil?
Sinungkit naman ng dating SEA Games record holder na si Ferrera ang gintong medalya sa Mem’s 35-years old category sa Hammer Throw Masters sa inihagis nitong 53.93m.
Pumangalawa si Yau Yin Chang (38.13m) habang ikatlo si Han Ching Chang na kapwa mula sa Taiwan ( 29.91m).
Tampok din sa koponan sina Lerma Bulauitan-Gabito, Eduardo Buenavista, Reynato Unso, Emerson Obiena, at Rene Herrera.
Nanguna sa kanyang heat si Bulauitan-Gabito sa women’s 100m dash at long jump (40-44) habang tatakbo si Buenavista sa men’s 1,500m run, 5,000m run at 10,000m run (35-39). Ang PATAFA secretary general na si Unso ay sasali sa men’s 400m hurdles (55-59) habang lulundag si Obiena sa men’s pole vault at sasali 100m hurdles (50-54).
Sasabak pa si Ferrera sa men’s hammer throw, discus throw at shot put (35-39) habang aarangkada si Herrera sa men’s 1,500m run, 5,000m run at 3,000m steeplechase (35-39).
Kasama din sa delegasyon sina Joebert Delicano, Julius Nierras, Sean Guevarra, Julius Sermona, John Lozada, Danilo Fresnido, Edward Obiena, Fidel Gallanero, Christabel Martes, Mary Grace Milgar, Jeanette Obiena, Edward Kho, Jose Ang, Arnel Lobos, Margarito Baniqued at Mario Castro.
Ang torneo ay qualifying event para sa 24th World Masters Athletics na idaraos sa Perth, Australia sa Oktubre.
(Angie Oredo)
