Tangan na ang tiket para sa Rio Olympics, ngunit nais ni Southeast Asian Games long jump queen Marestella Torres-Sunang na lehitimong makapagkuwalipika sa quadrennial meet sa pamamagitan ng qualifying standard.
Ito ang nagsisilbing na motibasyon ng 33-anyos na kampeon sa kanyang pagsalang kasama ang iba pang beteranong Pinoy athlete sa 19th Asian Masters Athletics Championships na nagsimula kahapon sa National Stadium sa Kallang, Singapore.
Ang torneo ay una sa dalawang natitirang pagkakataon hindi lamang para kay Torres-Sunang kundi pati na rin sa iba pang miyembro ng Philippine Athletics Track and Field Association (PATAFA) na nagbabakasaling makapasa sa qualifying standard para makalaro sa Rio Games sa Agosto 5-21.
Umaasa si Torres-Sunang na mas mapapataas ang kanyang marka matapos magtala ng 6.13 metro sa ginanap na Philippine National Games sa Lingayen, Pangasinan at 6.60 metro sa PATAFA National Open na isinagawa sa PhilSports Arena.
KILALANIN: Sino si Franco Mabanta at bakit siya tinugis ng awtoridad?
“Hindi pa po sigurado kung alin sa Vietnam o Thailand Open ang sasalihan namin pero isa na lamang po doon ang last chance ko para makapag-qualify,” sabi ni Torres-Sunang na bitbit ang personal best na 6.71 metro na itinala nito sa Malaysia SEA Games.
Sasabak si Torres sa women’s long jump (35-39) sa Asian Masters.
Samantala, unang sasabak sa aksiyon ang thrower na si Erlinda Lavandia na ipagtatanggol ang kanyang korona sa women’s javelin throw, discus throw at shot put sa (60-64) division. Tampok din sa koponan sina Lerma Bulauitan-Gabito, Eduardo Buenavista, Reynato Unso, Emerson Obiena, Arniel Ferrera at Rene Herrera.
Lalahok si Bulauitan-Gabito sa women’s 100m dash at long jump (40-44) habang tatakbo si Buenavista sa men’s 1,500m run, 5,000m run at 10,000m run (35-39). Ang PATAFA secretary general na si Unso ay sasali sa men’s 400m hurdles (55-59), habang lulundag si Obiena sa men’s pole vault at sasali 100m hurdles (50-54).
Ang dating SEA Games record holder na si Ferrera ay susubok sa men’s hammer throw, discus throw at shot put (35-39) habang aarangkada si Herrera sa men’s 1,500m run, 5,000m run at 3,000m steeplechase (35-39).
Kabilang din sa delegasyon sina Joebert Delicano, Julius Nierras, Sean Guevarra, Julius Sermona, John Lozada, Danilo Fresnido, Edward Obiena, Fidel Gallanero, Christabel Martes, Mary Grace Milgar, Jeanette Obiena, Edward Kho, Jose Ang, Arnel Lobos, Margarito Baniqued at Mario Castro.
Ang torneo ay qualifying event para sa 24th World Masters Athletics na idaraos sa Perth, Australia sa Oktubre.
