OAKLAND, California (AP) — Sa bawat paglagapak, asahan ang matinding pagbangon ng Golden State Warriors.
Naisalpak ni Stephen Curry ang siyam sa 13 ibinatong 3-point shot tungo sa kabuuang 39 puntos para pangunahan ang Warriors sa matikas na pagbangon mula sa mapait na kabiguan na pumutol sa kanilang home-game 54-game winning streak sa pamamagitan ng 136-111 panalo kontra Portland Trail Blazer, Linggo ng gabi (Lunes sa Manila).
Nag-ambag si Draymond Green ng 22 puntos, 10 rebound at 10 assist para sa ika-13 triple-double ngayong season, habang tumipa si Klay Thompson ng 21 puntos para sa Warriors, napantayan ang record ng 1996-97 Chicago Bulls at 1971-72 Los Angeles Lakers na may 69 panalo sa isang season.
MAVERICKS 88, TIMBERWOLVES 78
'Pikon daw?' UAAP fan na nag-dirty finger, agaw-eksena sa San Juan Arena!
Sa Minneapolis, ginapi ng Dallas Mavericks, sa pangunguna ni Wesley Matthews na kumana ng 19 puntos, ang Minnesota Timberwolves para patatagin ang kampanya sa No. 8 spot sa Western Conference playoff.
Sa iba pang laro, nagwagi ang LA Clippers sa Wizards, 114-109; ginapi ng Cavaliers ang Hornets, 112-103; naungusan ng Rockets ang Thunder, 118-110; tinalo ng Pelicans ang Nets, 106-87; namayani ang Jazz sa Suns, 101-86; pinabagsak ng Magic ang Grizzlies, 119-107; dinaig ng Celtics ang Lakers, 107-100; giniba ng Bulls ang Bucks, 102-98; tinalo ng Pacers at Knicks, 92-87.
