Pinangunahan ni House Speaker Feliciano Belmonte, Jr. ang mga miyembro ng Kamara sa pagkilala at pasasalamat sa gobyerno ng Italy sa P1.65-bilyon tulong-pinansiyal nito para sa mga proyektong makatutulong sa mahigit 18,000 agrarian reform beneficiaries (ARBs) sa Mindanao.
Iginawad ni Belmonte ang pagkilala sa courtesy visit sa Kongreso ni Massimo Roscigno, Ambassador Extraordinary and Plenipotentiary ng Embassy of Italy sa Pilipinas.
Iprinisinta ni Belmonte kay Roscigno ang kopya ng House Resolution 242, na nagsasaad ng pasasalamat ng Kamara sa gobyerno ng Italy dahil sa tulong-pinansiyal sa agrarian reform communities sa Mindanao, sa pamamagitan ng Italian Assistance to the Agrarian Reform Community Development Support Program (IARCDSP). (Bert de Guzman)
