Para mas mapatibay ang kahandaan ng Pinoy wrestler sa kanilang pagsabak sa Olympic qualifying, nakatakdang sumabak ang Philippine Team sa Asian Wrestling Championship sa Bangkok, Thailand sa Pebrero 15-21.
Ayon kay Wrestling Association of the Philippines (WAP) secretary-general Marcus Valda, ang torneo ang gagamitin ng koponan para maihanda ang kanilang kumpiyansa sa Asian Olympic Qualifying Championship sa Marso 17-21 sa Astana, Kazakhstan.
Binubuo ang delegasyon nina Alvin Lobrequito sa 55kg, Jhonny Morte sa 63kg, Francis Villanueva at ang tanging babaeng wrestler na si Minalyn Foy-os.
Hindi nakasama si Jason Balabal, 2013 SEA Games silver medal winner, matapos mabigong makakuha ng abiso mula sa Armed Forces of the Philippines (AFP) kung saan isa siyang enlisted personnel.
