Tatlong pribadong palengke ang pinadalhan ng closure order ng Quezon City government dahil sa kakulangan ng permit mula sa pamahalaang lungsod.
Una nang binalaan ng City Hall ang tatlong palengke sa Balintawak upang kumpletuhin ang mga requirement para gawing legal ang kanilang operasyon.
Ang mga pribadong palengke na pinadalhan ng cease and desist order ng QC Market Development and Administration Department (MDAD) ay kinabibilangan ng Cloverleaf Market, MC Market, at Riverview Market.
Ayon kay QC Market Administrator Noel T. Soliven, ang tatlong pribadong palengke ay walang locational clearance, walang building permit, walang sewage treatment facility, walang environmental clearance, at may iba pang paglabag sa mga ordinansa ng pamahalaang lungsod.
