Pinayuhan ng Metropolitan Manila Development Authority (MMDA) ang mga motorista na gumamit ng alternatibong ruta at iwasang dumaan sa mga lugar na roon magsasagawa ng road re-blocking ang Department of Public Works and Highways (DPWH), partikular sa EDSA at sa C-5 Road, ngayong weekend.
Ayon sa MMDA, 11:00 kagabi nang sinimulan ng DPWH ang pagkukumpuni sa southbound lane ng EDSA, sa pagitan ng Aurora Boulevard at P. Tuazon Streets, Service Road, unang lane mula sa sidewalk; northbound C-5 Road sa harap ng SM Warehouse gate 2, ikalawang lane, outermost; at bahagi ng EDSA, sa harap ng DPWH-QCSED, unang lane mula sa sidewalk.
Ayon sa ahensiya, inaasahang matatapos ang pagkukumpuni sa mga naturang kalsada sa Lunes, Enero 18, sa ganap na 5:00 ng umaga.
Unang inirekomenda ni DPWH-National Capital Region Director Melvin Navarro sa MMDA ang pagsasaayos sa nasabing bahagi ng EDSA.
