ITINATAG 80 taon na ang nakalilipas noong Disyembre 21, 1935, naglilingkod, nagtatanggol, at nagbibigay ng proteksiyon ang Armed Forces of the Philippines (AFP) sa bansa at sa mamamayan nito—sa lupa, sa himpapawid, at sa dagat. Pinaninindigan ng AFP ang misyon, hangarin, at tungkulin nito sa tatlong pangunahing serbisyo—Army, Navy (binubuo ng Philippine Fleet at Marine Corps), at Air Force. May aktibo itong 130,000 tropa, at 130,000 sa reserve service.
Itinataguyod at tinitiyak ng AFP ang soberanya ng bansa at sinusuportahan ang Konstitusyon nito; pinoprotektahan ang teritoryo ng Pilipinas mula sa pangungubkob ng mga dayuhan at pakikialam na panloob; ipinaglalaban ang mga pambansang layunin, interes, at polisiya; at pinaplano ang organisasyon, pagmamantine, pagpapaunlad, at pagtatalaga ng mga regular at citizen armed force nito para siguruhin ang seguridad ng bansa.
Si Pangulong Benigno S. Aquino III ang commander-in-chief ng AFP, at si General Hernando DCA Irriberi ang chief-of-staff. Isinusulong nito ang mga programang Transformation Roadmap, isang Internal Peace and Security Plan (IPSP) Bayanihan, at isang pinalawak na plano sa modernisasyon. Inilunsad ang IPSP Bayanihan noong Enero 1, 2011, na may anim na taong timeframe para sa pagbabago ng puwersa, na mula sa pagtuon sa mamamayan ay tututok na ngayon sa pagtatanggol sa teritoryo.
Ang Republic Act (RA) 10349, ang New AFP Modernization Act, ay nilagdaan noong Disyembre 11, 2012, at pinalawig ng panibagong 15 taon ang AFP modernization plan upang paigtingin ang mga programa sa capability-upgrade at magamit nang wasto ang kakayahan ng mga sundalo. Inamyendahan nito ang RA 7898, ang orihinal na AFP Modernization Act, na nilagdaan noong Pebrero 23, 1995.
Ang mga sundalo, airman, navyman, at marines ay nagsasakatuparan ng napakaraming tungkulin, kabilang ang non-military gaya ng pagtulong tuwing may kalamidad, tigil-pasada; pagtatayo ng mga kalsada, tulay, at silid-aralan; paggawa ng mga bahay para sa mga sibilyan; pakikiisa sa literacy campaign; at pagsasagawa ng mga peacekeeping at humanitarian mission. Nagkakaroon din sila ng mga oportunidad sa advancement at upgrade sa pagsasanay, estratehiya, at taktika, sa pamamagitan ng mga scholarship grant at skills development dito at maging sa ibang bansa. Ang Philippine Military Academy at ang National Defense College of the Philippines ang mga pangunahing institusyon sa pagsasanay sa depensa.
Bilang pangunahing tampok sa ika-80 anibersaryo ng pagkakatatag nito, isang F/A-50 “fighting eagle” ang lilipad at magsasagawang high-speed pass. Isa ito sa dalawang jet fighter na nai-deliver sa bansa ngayong buwan bilang bahagi ng isang 12/F/A-50 deal na nagkakahalaga ng P18.9 bilyon sa pagitan ng Pilipinas at South Korea. Kinikilala ang matinding banta ng climate change, inilunsad ng AFP nitong Disyembre 7 ang “Race to 1,000,000 Seedlings”, na planong magtanim ng isang milyong puno sa loob ng isang taon.
Ang AFP ay nag-ugat sa Tejeros Convention noong Marso 22, 1897, nang itatag ng rebolusyonaryong pamahalaan ni Heneral Emilio F. Aguinaldo ang Philippine Army, na nakipaglaban sa Spain simula Agosto 30, 1896, hanggang sa Treaty of Paris noong Disyembre 10, 1898. Isang bagong Philippine Army ang itinatag ng mga Amerikano, sa bisa ng Commonwealth Act No. 1, ang National Defense Act na nilagdaan noong Disyembre 21, 1935. Pinalitan ang Philippine Army at ginawang AFP noong Disyembre 23, 1950.
