DASMARIÑAS, Cavite – Isang babae at ama niyang barangay tanod ang inaresto nitong Huwebes ng intelligence team ng lokal na pulisya sa isang buy-bust operation sa Datu Esmael, sa siyudad na ito.
Ayon kay Supt. Hermogenes Duque Cabe, officer-in-charge ng Dasmariñas City Police, nakumpiska mula kay Aira Upao Pagong, 29, ang isang sachet na naglalaman ng nasa 200 gramo ng hinihinalang shabu.
Arestado rin sa nasabing operasyon ang ama ni Pagong na si Masarenga Mao Fundamdag, 60, sa pag-iingat ng .45 caliber Norinco pistol na may magazine na kargado ng pitong bala at isang sumpak at 11 bala ng 12-gauge.
Dinala ang mag-ama sa himpilan ng Dasmariñas City Police, gayundin ang nakumpiskang ilegal na droga na nagkakahalaga ng P300,000 at mga baril, para sa paghaharap ng mga kaso laban sa mga ito. (Anthony Giron)
National
