Turuan nang turuan; sisihan nang sisihan - iyan ang nangyayari ngayon sa gobyernong Aquino matapos ang kahila-hilakbot na pagkamatay ng 44 miyembro ng PNP Special Action Force (SAF) sa kamay ng magkasanib na puwersa ng MNLF at BIFF.
Ang misyon ng SAF ay isilbi ang arrest warrant sa Malaysian bomb expert na si Zulkifli bin Hir alyas Marwan, at local terrorist na si Abdulbasit Usman. Parehong may patong na milyun-milyong dolyar ang dalawa sa kanilang ikadarakip o ikamamatay. Sinisisi ni Boy Sisi, este Pangulong Noynoy, si SAF Director Getulio Napenas sa kakulangan o kawalan ng koordinasyon sa kinauukulang mga awtoridad para sa reinforcement.
Nagtataka rin sina DILG Sec. Mar Roxas at PNP OIC Deputy Director Leonardo Espina kung bakit hindi ipinaalam sa kanila ang operasyon ng gayong importanteng operasyon ng SAF sa Mamasapano, Maguindanao. Sabi nga ni Roxas nang makapulong niya ang mga tauhan ng SAF na lumuluha sa Camp Bagong Diwa: “Ni ha, ni ho ay wala akong alam d’yan.”
May lumulutang na mga espekulasyon na ang operasyong paghuli kay Marwan ay ekslusibong sina PNoy at suspended PNP Chief Director General Alan Purisima lang ang nakaaalam. Ang dahilan daw ay para makabangon sa kinalalagyang situwasyon ngayon si Sir Alan na sinuspinde ng Offfice of the Ombudsman sa alegasyon ng katiwalian. Isa pa raw dahilan ay para makamit ni PNoy ang Nobel Prize kapag nagtagumpay ang pag-neutralize kay Marwan.
