CAMP DANGWA, Benguet – Kinasuhan na ng Abra Police Provincial Office ng homicide at alarm and scandal ang suspek ng ligaw na bala mula sa pinaputok na baril noong Bagong Taon ay nakapatay sa isang mag-aaral sa elementarya sa Tayum, Abra.
Sinabi ni Senior Supt. Albertlito Garcia, provincial director, na si Henry Trinidad Tejero, ng Barangay Deet, Tayum, ang itinuturo ng mga testigo na nagpaputok ng walang lisensiya niyang .45 caliber pistol na pumatay kay Jercy Buenafe Tabaday, ng Bgy. Bumangsat, Tayum.
Namatay ang bata habang inooperahan sa Abra Provincial Hospital para kunin ang bala na bumaon sa kanyang ulo.
Ayon pa kay Garcia, inatasan na ang Special Investigation Task Force Tabaday ng Police Regional Office-Cordillera na bilisan ang imbestigasyon para agad na mabigyang-katarungan ang pagkamatay ng bata.
