TARLAC CITY - Dahil sa maagap na pagresponde ni Senior Inspector Sonny Silva, commander ng Police Community Precinct-8, ay nasabat kahapon ang isang Toyota Vios na matagal nang pinaghahanap makaraang ma-carnap sa Baguio City.
Sa ulat sa pulisya ni Evelyn Quijano, 45, may asawa, negosyante, ng Tandang Sora, Quezon City, ang Vios (AAK-6899) ay sinasabing kinarnap sa Baguio City nina Arthur Seneca, 44, ng Barangay Palayan, Makati City; at Joseph Patrick Villa, 37, ng Bgy. San Josef, Jaen, Nueva Ecija.
Nabatid na nagtungo si Quijano sa Baguio noong Oktubre 20, 2014 at habang abala sa pakikipag-usap sa mga kaibigan ay sinamantala ng mga suspek ang pagkakataon at kinarnap ang Vios ng biktima.
