LEGAZPI CITY — Tiyak na naiibang karanasan ang naghihintay sa mga dayuhang delegado sa Informal Senior Officials’ Meeting (ISOM) ng Asia Pacific Economic Cooperation (APEC) na idaraos dito sa Disyembre 8-9, 2014.
Pamumunuan ng mga economic ministers at matataas na opisyal ng 21 bansang kasapi ng APEC, ang ISOM ang opening salvo ng serye ng ministerial at technical meetings tungo sa 2015 APEC Leaders Summit na pag-aabalahan ng Pilipinas sa 2015. Dito sa Albay idaraos ang sampu sa naturang mga komperensiya.
Ayon kay Albay Gov. Joey Salceda, ang 2015 APEC meetings ay tanging pagkakataon na naman para ibandila ng Albay ang mga makasaysayan, pangkalingangan ang pangturistang mga yaman nito. Kasama sa naiibang mga karanasang naghihintay sa APEC guests at delegates ang isang world-class welcome party para sa kanila na nakabatay sa cultural character at touristic assets ng Albay. Bukod dito, mayron ding cultural shows na aaliw sa mga bisita.
Ang ISOM ay masasabay sa pagbubukas at pagsisimula ng Albay Karangahan Green Christmas, isang buwang singkad na pista kung saan nakapaloob ang mga tradisyong Kristiyano at mga tugon sa pangkasalukuyang mga hamon, kasama ang “disaster risk reduction and climate change adaptation, indigenous resources, and endearment and pride.”
