MAY mga pag-iibigang pinatibay na ng panahon, at mayroon ding maagang sinubok ng pagkakataon. Pero sa gitna ng mga pinagdadaanang pagsubok, hanggang saan nga ba masusukat ang tatag ng isang pagsasama?

Ngayong Huwebes, hatid ni Jay Taruc at ng Motorcycle Diaries ang ilang natatanging kuwento ng mga taong matapang na hinaharap ang mga pagsubok kasama ang kanilang mahal sa buhay.

Nakaratay na sa kama matapos ma-stroke sa ikatlong pagkakataon ang otsenta anyos na si Tatay Pablito. Hirap at pagod man sa pag-aalaga, hindi sumusuko ang kanyang asawang si Nanay Lina. Sa loob ng 46 na taon nilang pagsasama, sabay nilang hinarap ang mga paghamon ng buhay para maitaguyod ang kanilang limang anak. Sa isang espesyal na pagkakataon, kasama ng mga anak at mahal nila sa buhay, muli nilang sasariwain ang mga pangako nila sa isa’t isa.

Tagahanga naman noon si Glen ng radio anchor na nakilala sa ere bilang si Larry King. Ngayon, 11 taon na silang nagsasama sa iisang bubong, at may tatlo nang anak-anakan. Para sa kanilang mga anak, paano nga ang buhay na may mga magulang na pareho ang kasarian? Paano nito nahubog ang kanilang pananaw? At hanggang saan ang pagtanggap ng lipunan para sa mga gay couple na nagnanais bumuo ng isang kumpletong pamilya?

Bukod sa pagkakaroon ng sakit sa pag-iisip, ipinanganak na pipi at bingi si Ruth. Pero sa kabila ng kanyang kapansanan, nakahanap siya ng pag-ibig sa katauhan ni Victor. Sa loob ng 20 taong pagsasama, nabiyayaan sila ng anak na ngayon ay 10 taong gulang na. Hirap man silang magkaintindihan noon, tila nakabuo na ng sariling wika ang dalawa na tanging sila lang ang nakauunawa.

Maaga namang humarap sa responsibilidad si Liezel, na sa edad na 15 ay may isang buwang gulang ng anak. Buo ang loob ni Liezel na palakihin ang kanyang anak, katulong ang 18 anyos na ama ng bata na si Nonoy. Paano hinaharap ng mga batang magulang ang mabigat na responsibilidad ng pagkakaroon ng pamilya sa mura nilang edad? At paano nabago ng bagong silang nilang anak ang mga pangarap at pananaw nila sa buhay?

Panoorin ang mga natatanging kuwento ng pag-ibig sa gitna ng pagsubok ngayong Huwebes, alas-10 ng gabi, sa Motorcycle Diaries sa GMA News TV.