TIYAK na magiging memorable para kay Maxene Magalona ang kanyang unang pagsabak sa Maalaala Mo Kaya dahil gaganap siyang nurse-rapper. Si Maxene, tulad ng alam ng lahat, ay anak ng pumanaw na master rapper na si Francis Magalona.
Mapapanood si Maxene sa Maalaala Mo Kaya ng ABS-CBN ngayong Sabado (Nobyembre 8).
Gaganap siya bilang si Fatima Palma na sumikat kamakailan sa Internet dahil sa isang video na makikita siyang kumakanta at nagra-rap para sa kanyang pasyente sa ospital.
“Panoorin n’yo kung paano nagagawang pasayahin ni Fatima ang kanyang mga pasyente sa pamamagitan ng pag-awit at pag-rap sa kabila ng kanyang paghihirap at pagod sa araw-araw niyang trabaho sa ospital.” Sabi ni Maxene. “Para sa akin, isa siyang bayani kaya malaking karangalan na ako ang napili na gumanap sa kanya.”
