Umapela sa publiko ang estasyon ng radyo ng Simbahang Katoliko na galangin ang standee ni Pope Francis, lalo na sa mga nagseselfie kasama ang imahe.
Ito ang pahayag ni Radyo Veritas President Fr. Anton Pascual matapos makatanggap ng mga ulat na may ilang tao ang nagpapakuha ng larawan sa life-sized standee ng Papa habang “bumubungisngis,hinahawakan ang bumbunan at pinagtitripan ang kalbong bahagi nito”.
“Picture taking either selfie or groupie must be taken with utmost respect. Indecent poses, vulgar dresses, and anything that is disrespectful are not allowed at all times,” pahayag ni Pascual.
Upang maiwasan ang pambabastos sa standee, nagpalabas ang Radyo Veritas ng mga panuntunan sa pamamahagi at paggamit ng mga standee ni Pope Francis. Nakasaad sa guidelines na dapat may italaga na mangangasiwa sa mga establisimiyento, na magbabantay at magmamantine sa mga standee.
